مدونه السلام وقناه الابداع Faculty of Agriculture كليه الزراعه التدوينه دي لكل اللى بيسئل على كلية الزراعة هتلاقى فيها كل الاسئلة اللى...
مدونه السلام وقناه الابداع
Faculty of Agriculture كليه الزراعه
التدوينه دي لكل اللى بيسئل على كلية الزراعة هتلاقى فيها كل الاسئلة اللى انتوا عايزينها والخاصة بمجال العمل والاقسام - قسم الهندسة الزراعية والبيوتكنولوجى ونظام الدراسة والتنسيق وغيرة
-----------------------------------------------------
1- العلوم الزراعية بتاخد من كام او الهندسه الزراعية او الجامعات التانيه ؟ حتى الان التنسيق لسه منزلش فمنعرفش لكن نعرف اخدت السنه الى فاتت من كام وهتبقى الدرجات قريبه جدا من السنه الى فاتت بس الكليات اللي اخدت اعتماد دولي وجودة بتعلى في تنسيقها
2- ايه الفرق بين كليات الزراعة فى الجامعات المختلفة ؟
القاهره وعين شمس والمنصورة واخدين الاعتماد والجوده وبرضو فيهم الاقسام الانجلش
القاهره بتتميز عن عين شمس بس بالمساحه والامكانيات زى
انها عندها مزرعتين واحده في بيئه طينيه وبيئه صحراويه و وملاعب ومنشئات اكبر بكتير من عين شمس والاسكندرية بتتميز برضو بمساحتها ووجود بيسين كبير فيها اما في مستوى التعليم والدراسه الاتنين قريبين اوى من بعض وكمان من باقى الجامعات وكمان اقسام الانجلش مش موجوده غير فى القاهرة وعين شمس والمنصورة والإسكندرية ومش موجوده ف الاقاليم .
3- ايه الاقسام الى موجوده في الكليه ومجالات العمل ؟
- قسم الانتاج النباتى
مجالات العمل
1- قسم انتاج نباتى من اكثر الاقسام طلبا في العمل لتنوع مجالات عمله
ومعلومه العمل في الانتاج النباتى والمزارع مربح جدا جدا
وكثير من رجال الاعمال الاغنياء كونوا ثورتهم من الزراعه
واللى بيدرب في مزرعه انتاج نباتى المهندس يبدأ عمله بمرتب 2500 +التامين
وبيشتغل 21 يوم بياخد 9 ايام اجازه وفي مهندسين راتبهم بيصل الى 6 و 7 الاف جنيه وسنهم لا يتعدى 32 سنه
ولو الواحد ركز انه يبقى ليه مشروعه يقدر يكسب اكتر وبارباح كبيره جدا بس طبعا يكون عنده الخبرة الكافيه
خريج قسم انتاج نباتى يقدر يشتغل في :-
1- معيدا في الكليه ( تصلح للبنات )
2- في مراكز البحوث (تصلح للبنات )
3- المركز القومى للبحوث (تصلح للبنات)
4- مهندسا زراعيا في مزارع الفاكهه والخضر والمحاصيل
5- مصمم حدائق (لاند سكيبر) (تصلح للبنات)
6- مشاتل الفاكهه والخضر والزينه (تصلح للبنات) لان اغلبيه المشاتل بتبقى في اماكن قريبه من الجيزه والقاهره والعمل فيها بيبقى الصبح ولو مركزين هتلاقوا المنيل مليان مشاتل زينه وفي اماكن كتيير اوى قريبه فاكهه
7- في شركات انتاج التقاوى (تصلح للبنات)
8- مراقب جوده في مصانع تصنيع الفاكهه والخضر (تصلح للبنات) يعنى المهندس بيشوف جوده الثمار الى داخله المصنع وبيراقبها
9- في محطات التعبئه وفرز الفاكهه والخضر (تصلح للبنات)
10- في وزارة الزراعه (تصلح للبنات )
11- التخصص في التداوي بالأعشاب الطبية والعطرية
--------------
2- قسم انتاج حيوانى
مجالات العمل
-----------
1-مهندس زراعى في اي من مزارع الدواجن
2- مهندس زراعى في مزارع الاسماك
3- مهندس زراعى في مزارع الماشيه والحلاب
4- مهندس في معامل التفريخ
5-مهندس في مصانع الاعلاف المختلفه
وايضا الانتاج الحيوانى ليس له بديل وشئ ضرورى للانسان وبلتالى عليه اقبال كبير ومربح جدا ومن ميزة هذا القسم ان العمل فيه بعد التخرج مطلوب جدا وسهل جدا
وايضا عمل مشروع خاص ليس بالتكاليف الكبيره مثل باقى الاقسام فسهل جدا ان تبدا براس مال ليس بضخم
3-قسم علوم الاغذيه
-----------------
مجالات العمل
-----------------
مراقب جوده او مهندس انتاج في كل مصانع الالبان والصناعات الغذائيه
مثل جهينه -فرجللو- نسلة- امريكانا -المراعى
تقدر تعمل فيه دبلومات بعد ما بتخلص كلها جميله جدا ف مجالات الميكرو و الكيميا و الايز و الهاسب ودبلومات تانيه كتيررر ده غير ان ف دبلومة بتتعمل ف القسم عن تغذية الانسان و بتبقى منها اخصائي تغذية ومجالات شغل القسم عمتن ( مهندسين الجوده ف مصانع الاغذيه و الالبان - مراقبة الجوده - التحيليل الكيميائي - التحليل الميكروبيولوجى - اخصائى تغذيه الانسان ( واحد من الفريق الطبي المعالج - الفنادق و المستشفيات تخطيط وجبات و نظم التغذيه )
4-قسم وقايه النبات
مجالات العمل
يستطيع خريج هذا القسم ان يعمل
1- مهندس مكافحه في مزارع الانتاج النباتى
2- تحليل وتركيب المبيدت
3- في شركات المبيدات والاسمده في مجال التسويق وهو مربح جدا مثل شركات شورى وسينجنتا
4- مهندس في مناحل العسل
5- قسم التكنولوجيا الحيويه
مجالات العمل
-----------------
1-كيميائي في معامل التربه والنبات
2- كيميائي في معامل تحاليل طبية
3- في شركات الادوية
4- في تصنيع المبيدات والاسمده
5- في مصانع التى تتم في صناعتها الخمائر والدهون
6- المقاومه الحيويه للافات
6- قسم الاراضي والمياه
مجالات العمل
1-استصلاح الاراضى الزراعيه
2- تحليل مياه الرى والتربه
3- معالجة مياه الري
4- تدوير المخلفات الزراعيه
5-انتاج الاسمده
7- قسم العلوم الاقتصاديه والاجتماعية
مجالات العمل
1- مرشد زراعى
2- منظمات المجتمع المدنى
3- العمل في اي شركه لها علاقه بالزراعه في مجال التسويق او الاداره
4- ادارة وتخطيط المشاريع الزراعيه
4- ايه الفرق بين الاقسام الانجلش والاقسام العربي
الانجلش التخصص فيها بيبقى من سنة اولى وبتبقى الدراسه فيها بالانجلش
وبيبقى في فرصه للتدريب في شركات وجامعات اجنبيه للمتفوقين
وشرط انك تدخل الاقسام دى انك تكون جايب في الانجلش 70%
و3 اقسام
بيوتكنولوجى ب 10.000 ج واحتمال يغلى
الزراعه الدوليه ب9.000 جنيه
فوود بروسيسنج ب9.000 جنيه فى السنه
والاقسام دى مش فى كل الجامعات زى ما وضحنا قبل كدا
5- ايه شروط قسم البيو تكنولوجى ؟
انك تكون جايب في درجه الانجلش في ثانوى 70 %
وفي حالة ان العدد كبير الى متقدم وده اكيد هيحصل بيتعمل مفاضله بين الطلاب
وبتبقى المعيار فيها درجه الانجلش +درجه الكيمياء+درجة الاحياء +الانترفيو والانتر فيو بيقدر يرجح شخص عن شخص
6- بيسئلوا ايه في الانتر فيو بتاع بيوتكنولوجى ؟؟
بيسئلو اسئله عامه زى عرفي نفسك والدك بيشتغل ايه
تعرفي ايه عن البيوتكنولوجى وعايزه تدخلى القسم ليه وعباره عن دردشه الهدف منها قياس قوة اللغه
7- ايه الفرق بين بيوتكنولوجى علوم وبيو زراعة ؟؟
نفس مجالات العمل تقريبا ولكن في زراعه مواد الوراثه اكتر من علوم وفي الكيمياء وفيه مواد بتدرس بالانجلش وده بيخليه يتميز عن بيو علوم بالإضافة الى التقنيات الصيدلية .
8-هو ينفع اطلع من بيوتكنولوجى واشتغل دكتور تحاليل ؟؟
ناس كتيير بتسئل عن موضوع معامل التحاليل الطبيه
وان في ناس داخله مخصوص بايوتكنولوجى عشان تشتغل او تفتح معمل تحاليل طبيبه
اولا : وناس كتيير متعرفهوش
ان من حق خريجين كليات الزراعه فتح معامل تحاليل طبيه باسمهم بعد اخذ دبلومه كيمياء حيويه او ماجستير في الكيمياء الحيويه او دكتوراه
والى هيسأل بيتاخدوا من فين
في جامعات كتير بتدى الدبلومه دى وفي اي جامعه تقدر تحضر ماجستير في الكيمياء الحيويه او البكتيريولوجي الإكلينيكي او الباثولوجي الإكلينيكي .
ومش بس كده ده كمان ممكن تفتحه وانت اي قسم من كلية الزراعة المهمه انك تاخد دبلومه كيمياء حيويه او دبلومه باثولوجى او بكتريولوجى.
وده مديه لنا قانون مزاوله مهنه التحاليل الطبيه لسنه 1954
---------------------------------------------------------------------------------------
قسم الهندسة الزراعية والنظم الحيوية
------------------------
اولا : هذا القسم فقط لطلاب علمى رياضه وياتى الترشيح له من مكتب التنسيق
بيبقى بالشكل ده زراعه /رياضه
بيتم التخصص من الترم الاول
وبيهم في القسم دراسة مواد القسم والتى تشمل بعض مواد الكليه
من الاقسام الاخرى زى الانتاج النباتى والحيوانى
والقسم ده يعتبر من المجموعة لانه بيدرس فيه كل الميكنه المستخدمة في الزراعه من جرارات لشبكات ري لابيار كل المعدات الزراعيه
بعض المواد
رسم هندسي -آلات زراعية -هندسة الصرف الزراعى -ادارة وتشغيل الجرارت الزراعيه - الألات الهيدروليكية .
-----------------------
مجالات العمل
---------------
يجب ان يكون في اي مزرعه كبيره مهندس هندسه زراعيه
وبيكون عمله في صيانه شبكات الرى والابار والطلمبات
وجميع المعدات الزراعيه
اقرا أيضاً
قسم علوم الاغذيه أو الصناعات الغذائية الخاص بكلبه الزراعه بعض المفاهيم وإليه الدراسه ومجال العمل
